|
Schwäbisch im Jahr der Krise
Wirtschaftskrise – Bankenkrise – Gesellschaftskrise - „ma ka’s ga nemme höra ond wünscht sich a Abwrackprämie für Krisana aller Art! Ond mittla nei dia ooglaubliche Meldong, dass es Bairische ond Kölsch als Sprocha vom Aussterba bedroht send! Kasch des glauba?“
Damit des mit em Schwäbischa it bassiert, macha mir weiter mit em schwäbischa Programm – au em zwölfta Johr der Wanderschaft! Ond des will sich fei it schleacht aalassa: Afang April en Sulga em Sterna zom Sternagucker werra, en Mochawanga fier der Musikverei der Conferencier spiela, Ende April en Auladorf a schees großes Konzert – „HOIMAT-LIADER“, und glei danoch en Braunaweiler bei Wuuschtsalat und Brot aus em Dorfbackhäusle a schees oberschwäbisches Dörfle besenga!
Wa no? Wenns guat goht, feira mir wieder en Michelweniga (Michelwinnaden) em Wald Walpurgis ond Sommersonnawend, ond wa der Herbscht no brengt… mol seaha!
En Großkopfeta hot mol gsait: „In der Krise zählt vor allem die Rückbesinnung auf die gewachsenen Werte, und die sind vor allem in der Heimat und den dort gewachsenen Bindungen zu finden!“ Schee gsait – so soll’s sei! Mir lont eis des Schwäbische it weg globalisiera, des isch eiser Hoimat, do send eisre Wuuzla ond do schöpfa mir Kraft raus.
Es gilt: Schwäbisch duat guat ond Schwäbisch isch schee – au em Jahr der Krise….
Auf uiern Bsuach ond uire Eiladonga frait sich
uier Michael Skuppin
|
